ជម្ងឺបេះដូង គឺជាមូលហេតុសំខាន់មួយដែលបណ្ដាលឱ្យមានមនុស្សស្លាប់ច្រើនក្នុងពិភពលោក។ មិនត្រឹមតែមនុស្សដែលមានបញ្ហាបេះដូងពីកំណើត សូម្បីតែមនុស្សដែលមានកម្លាំងមាំមួន ក៏ អាចកើតជម្ងឺនេះ ហើយពេលខ្លះ អ្នកជម្ងឺបានមើលរំលងអាការៈដំបូងនេះ នាំឱ្យពួកគេមានការ ប្រឈមនឹងជម្ងឺដ៏កាចសាហាវ។
ការឈឺទ្រូង ជាអាការៈមួយដែលតែងត្រូវបានអ្នកជម្ងឺរអ៊ូរទាំប្រាប់គ្រូពេទ្យ នៅពេលពួកគេទៅ ពិនិត្យបេះដូង ប៉ុន្តែ មិនមែនមានន័យថា រាល់អ្នកជម្ងឺឈឺទ្រូង គឺសុទ្ធតែមានបញ្ហាបេះដូងនោះ ដែរ។
ជម្ងឺបេះដូង
-ការឈឺទ្រូង ដែលមានលក្ខណៈដូចជាត្រូវគេសង្កត់ច្របាច់នៅកណ្ដាល ឬងាកមកខាងឆ្វេងនៃ ដើមទ្រូងបន្តិច និងមានរយៈពេលចាប់ពី ៣០នាទីឡើងទៅ ដោយមិនមានភាពធូរស្រាលពេល ដេកសម្រាក ឬប្រើថ្នាំ Nitroglycerine នោះគេត្រូវគិតដល់បញ្ហាគាំងបេះដូង។
ការឈឺទ្រូងដែលកើតឡើងដោយសារខ្វះឈាមបេះដូង/ខ្លាញ់ក្នុងសរសៃឈាមបេះដូង (ischemic heart disease) តែងតែរាលដាលមកកាន់ដៃឆ្វេង តែវាក៏អាចរាលដាលដល់ដៃស្ដាំ ឬស្មារ ក ខ្នង និងចុងដង្ហើម។
ជម្ងឺក្រពះ
-បើសិនការឈឺចុក ក្រោយពីហូបអាហារ ផឹកទឹក ផឹកស្រា នោះភាគច្រើនគឺដោយសារជម្ងឺ ក្រពះ។ ក៏ប៉ុន្តែ មានករណីមួយចំនួន ការឈឺបែបនេះ ក៏អាចបណ្ដាលមកពីបញ្ហាខ្វះឈាមបេះ ដូងផងដែរ។
តាមធម្មតា អាការៈឈឺចុកដោយសារជម្ងឺខ្វះឈាមបេះដូង ឬខ្លាញក្នុងសរសៃឈាមបេះដូង វា នឹងធូរស្រាលមកវិញ បន្ទាប់ពីបានលេបថ្នាំ Nitroglycerine ឬសម្រាកប៉ុន្មាននាទី (< ៣-៥នាទី)។ ផ្ទុយទៅវិញ បើសិនឈឺក្រពះ ឬបំពង់អាហារ វានឹងមិនងាយធូរស្រាល ឬធូរស្រាលដែរ តែប្រើ ពេលយូរ។
ជម្ងឺសួត
-ឈឺចាប់ភ្លាមៗដូចទៅនឹងត្រូវចុងកំបិត ហើយវានឹងឈឺខ្លាំងឡើងនៅពេលដកដង្ហើមចូល ឬ ពេលដេកផ្ងារ នោះគឺអាចបណ្ដាលមកពីរលាកសួត។ ជាងនេះ អាការៈខាងលើក៏អាចបណ្ដាល មកពីបញ្ហារលាកស្រោមបេះដូង (pericardium) ក៏ថាបាន។
នៅពេលមានអាការៈឈឺទ្រូងខាងឆ្វេង សូមកុំមើលស្រាល អ្នកគួរទៅពិនិត្យសុខភាពដើម្បីឱ្យ ដឹងថា អ្នកមានជម្ងឺបេះដូងឬអត់ និងដើម្បីព្យាបាលឱ្យទាន់ពេលវេលា។ នៅកន្លែងពិនិត្យសុខភាព អ្នកអាចនឹងត្រូវបានពិនិត្យសួតដោយកាំរស្មីអិច ពិនិត្យបេះដូងដោយការវាស់ចង្វាក់បេះដូង (ECG) និងអូកូបេះដូង និងសុងក្រពះដើម្បីឱ្យដឹងថា អ្នកមានជម្ងឺក្រពះឬអត់។ ក្រៅពីនេះ អ្នកក៏ នឹងត្រូវបានបូមឈាម យកទៅពិនិត្យរកជម្ងឺផ្សេងៗដែលពាក់ព័ន្ធផងដែរ៕
0 comments:
Post a Comment